ჩვენს შესახებ

„პურის ფესტივალი“ საქართველოში წელს მესამეჯერ ტარდება. მისი ინიციატორია ბიოლოგიურ მეურნეობათა ასოციაცია „ელკანა“. ღონისძიების მიზანია ხორბლის ადგილობრივი ჯიშების გადარჩენა და პოპულარიზაცია, ამ საქმიანობაში რაც შეიძლება მეტი ფერმერის ჩართვა და გაყიდვების მოკლე, თანამშრომლობითი ჯაჭვების წახალისება.

2010 და 2011 წელს ჩატარებულმა ღონისძიებებმა ხელი შეუწყო ახალციხის (მესხური) წითელი დოლის პურის საწარმოო მნიშვნელობის პოპულარიზაციას და გასაღების ჯაჭვის შექმნას. დღეს ახალციხის წითელ დოლის პურს გადაშენების საფრთხე არ ემუქრება - ფერმერებმა დაიწყეს მისი მოყვანა, ხოლო მისგან გამომცხვარი „დოლის პური“ ბაზარზე მოთხოვნით სარგებლობს. თუმცა საქართველოში ბევრად მეტია შესანარჩუნებელი - მათ შორის ხორბლის 5 უძველესი სახეობა საქართველოს ენდემია:

  • ჩელტა ზანდური - Triticum timopheevii Zhuk.
  • მახა - Triticum macha Men.
  • დიკა -Triticum carthlicum Nevski.
  • ჰექსაპლოიდური ზანდური - Triticum zhukovskyi Men.
  • კოლხური ასლი - Triticum palaeocolchicum Men.

წელს ფესტივალზე ქართული ხორბლის ენდემური სახეობის - დიკას პურიც გამოცხვება!

 ფესტივალი ფართო საზოგადოებას გააცნობს რეგიონის კულტურულ და ეთნოლოგიურ მემკვიდრეობას. ადგილობრივი პურისა და ტრადიციული კერძების დაგემოვნება, რეგიონის ღირშესანიშნაობებისა და მისი აგროტურისტული პოტენციალის გაცნობა საინტერესო გამოცდილებებისა და შთაბეჭდილებების მიღების საშუალებას მისცემს როგორც რეგიონის მაცხოვრებლებს, ასევე ჩამოსულ სტუმრებს.

2021 წელს „პურის ფესტივალი“ ისევ სამცხე-ჯავახეთში ტარდება. „ელკანას“ ინიციატივას წელს შემოუერთდა რეგიონის დანიშნულების ადგილის მართვის ორგანიზაცია (DMO), რომელიც ორი წლის წინ ტურიზმის ეროვნული ადმინისტრაციის და USAID/Zrda Activity in Georgia-ს ხელშეწყობით დაფუძნდა რეგიონის ექვსივე მუნიციპალიტეტის მიერ და აქტიურად ეწევა რეგიონის ღირშესანიშნაობების და ცოცხალი კულტურის პოპულარიზაციას და დაცვას.